|
She scoill raad ta ny paitchyn gynsaghey gagh cooish trooid chengey ny mayrey Ellan Vannin y Vunscoill Gaelgagh.
| SHENNAGHYS Y VUNSCOILL GHAELGAGH |
Hie Sheshaght ny Paarantyn er cummey ayns Luanistyn 2000 ry-hoi cur er bun scoill Ghaelgagh as ayns Mean Fouyir 2001 ghow shin toshiaght lesh 9 paitchyn; 4 veih Blein 1 as 5 veih Blein Toshee. Va shin er nyn aaghtey ayns Scoill Vallacottier, Doolish as hannee shin ayns shen dys 19oo Mee ny Nollick 2002 as John Rhodes myr ard-ynseyder. Hug John mooarane cooney dooin gyn cur eie er ny va shin jannoo, shen dy ghra dy daag eh shin dy chroo yn curriglym ain hene soit er yn Churriglym Ashoonagh. Hie Gaelg er loayrt feiy'n laa liorish ny fir-ynsee veih'n toshiaght as cha nel yn polasee shoh rieau er chaghlaa. She Julie Matthews va'n ven-ynsee as currym urree, as she Cathy Clugaaish va'n voandyr-ynsee.
Bione dooin veih'n toshiaght dy jinnagh shin arraghey dys shenn troggal Scoill Valley Keeill Eoin cha leah's darree yn scoill shen v'ayn, dys y troggal noa eck. Hickyree Phil Gawne OKF as Caairliagh Vooinjer Veggey neesht shoh er nyn son ain.
Hie shin stiagh marish ny scollagyn ec Scoill Noa Valley Keeill Eoin, Raad yn Stashoon, ayns imbagh yn iarree Jerrey Geuree 2003 as va shin er nyn aaghtey ayns shen dys Jerrey Souree 2003 myr yn brastyl ain hene. Va shin fieau er obbyr y ve jeant er yn çhenn scoill roish my dod shin goll stiagh sy troggal.
Nigel Bennett va ard-ynseyder Scoill Valley Keeill Eoin. V'eshyn scanshoil erskyn towse cur cooney shin hene y chur er bun sy çhenn troggal as smooinee eh er ooilley ny baccyn harragh yn raad ain; dys quoi ghlennagh yn troggal as cre haghyragh ec traaghyn jinnairagh son cha row skimmee jinnairagh ain. Chooin eh lhien cur er bun wheesh as va jantagh as veih Jerrey Souree 2003 darree shin dys yn troggal ain hene er y raad mooar. Ren shin farraghtyn dy ymmydey seyraadyn ee ec y scoill noa ec traa jinnairagh derrey va shin jargal skimmee jinnairagh ain hene y phointeil as myr shen scuirr troailt noon as noal veih'n scoill noa, ren sauail traa ynsee. Haink shin dy ve er enney myr y Vunscoill Ghaelgagh fo stiurey Nigel Bennett myr ard-ynseyder.
Ayns Mean Fouyir 2006 va Julie Matthews er ny hardjaghey dys Ard-ynseyder y Vunscoill Ghaelgagh. Haink Kate Pitts dy ve ny holtey jeh'n skimmee myrgeddin myr Ynseyder Vlein Toshee Nane. Haink shin dy ve nyn scoill ain hene. Va Bnr. Matthews ny hard-ynseyder ta gynsagh. Hoshee shin lesh rolley scoill ec yn amm shoh jeh 47 paitchyn as nish va paitchyn ain ayns dagh possan eash veih 4 - 11. Va Julie Matthews er ny cummal seose liorish daa ynseyder lane-emshiragh Mnr Paul Rogers haink stiagh ayns Mean Fouyir 2003 as Bnr. Kate Pitts haink stiagh ayns Mean Fouyir 2006. Va ny cooneyderyn-ynsee goaill stiagh Bnr. Clugaaish, Bnr. Jacky McVerry as Bnr. Ealee Sheard as Bnr. Annie Kissack. Haink Annie dys y scoill er corys shiaghtinoil dy chur daa voghree jeh son traa plannal da'n ard-ynseyder as fastyr y pheesh da'n daa ynseyder elley. Va argid ayn cour reireyder paart-emshiragh, Bnr. Moore. Ec y traa ta shoh goll er screeu, ta 54 er y rolley. Jimmee yn chied sheshaght ain ayns Jerrey Souree 2007 as caa oc goll er lesh nyn studeyrysyn Gaelgagh ayns Mean Fouyir 2007 ayns Ardscoill BREII, Purt ny Hinshey as kiarail er ny yannoo son Shennaghys, Y.Cr. as çheeroaylleeaght dy gholl er ynsagh ec Bnr. Fiona McCardle, Mnr. Paul Rogers as Mnr. Rob Teare. Bee caa ec ny paitchyn shoh yn GCSE oc sy Ghaelg y yannoo as te jerkit dy jean ad shoh y chooilleeney roish kione nyn gied imbagh.
Fys s'noa Jerrey Fouyir 2009
Ta 64 ain er y rolley nish as fwirran dy chiare ynseyderyn as ard-ynseyder nagh vel gynsagh. Shoh yn skimmee-ynsee ain: Bnr. Kate Pitts (Blein Toshee); Bnr. Aalin Clague (Bl 1&2); Bnr. Annie Kissack (Bl 3&4) as Mnr. Paul Rogers (Bl 5&6). She Julie Matthews foast yn ard-ynseyder ta coodagh traa PPA son ooilley yn skimmee-ynsee feiy'n çhiaghtin. Ta traa currit da Annie dy ynsagh Baarle da bleeantyn 3-6 er chorys shiaghtinoil. Ta tooilley cooney çheet veih Bnr. Jackie McVerry (NNEB lane-emshiragh) as Bnr. Sharon Christian (LSA son lieh hiaghtin) ghow toshiaght ec y Vunscoill ayns Mean Fouyir 2008.
Ta'n chied sheshaght ain daag nish ayns Blein 9 as ta paart jeu er noll er lesh yn ynsagh oc trooid y Ghaelg.
ER NY AARLAGHEY LIORISH J MATTHEWS, ARD-YNSEYDER MEAN FOUYIR 2007 as CURRIT SEOSE GY DATE JERREY FOUYIR 2009
|
